1月的時候,我們做了個關於長板落斜的故事,認識了駕駛FPV的Jerry。那時候的他好文靜,戴著VR眼罩坐在車上,在曲折山路追逐長板好手們下山。神情緊張專注得叫極都唔應,像被綁架。車到山腳停下,除罩,魂魄歸位一樣:「喂呀!我全程扎住馬揸機,但好正呀!」用獨特敏捷的反應,拍下我們平時看不到的香港絕景。
FPV即是First Person View。一般航拍機其實自己會飛。沒電,斷訊號,它都會自己飛回你手。FPV除了眼罩內的畫面是實時連結無Delay,還得全人手操作。活動範圍360度無限制,戴上VR眼罩,彷彿突然靈魂出竅。競速賽場的FPV,時速可達250km/hr以上。但有些人為追求更佳畫質,他們在FPV上加裝GoPro。機身重了,但最高時速也可達200公里,極考駕駛時的即時反應。
高瘦的Jerry是新加坡人,形容自己是個宅男,去年辭了工作轉做Freelancer,全職幫人拍片剪片,以及拍FPV。平時看得多都知,玩FPV的人最鍾意搵摩天大樓,一口氣由頂樓Dive到底,好刺激。香港樓多人更多,你玩又會俾人話危險了。於是,喺天朗氣清的日子,好健康的Jerry約跟幾個FPV好友Tommy同Zakir 。每人揹住兩、三隻FPV機,十幾粒電池,最少6至8kg的背包出發,我們這個訪問,便搬了上香港三尖之一的釣魚翁進行。「飛機沿綿長山背疾走,到山頂標高柱時斷電,讓它自由落體下潛(Dive),秒半鐘跌到山腳即接通電源回防上山頂盤旋,嘩‧‧‧‧‧‧自己變咗好似雀仔咁,鍾意點飛就點飛,好free,好刺激。」我等凡人睇到天旋地轉明明腳踏實地都要踎低定驚。Jerry:「初初玩時唔慣,身體總想跟住畫面走來平衡,搞得像米高積遜Moon Walk。」Tommy:「有朋友玩到好緊張,打開個口,我哋伸手指入佢口裡都唔知。」