香港第一個自由潛水教練大讚 香港水域物種豐富 魔鬼魚、吞拿魚、油甘魚都有！

「香港的水好濁！」，「睇海洋生物去海洋公園啦。」相信是大部分人對香港海洋的刻板印象。潛水經驗超過20年的Chris，探索過香港水底不少地方，曾經見過魔鬼魚、吞拿魚、油甘魚等。「佢哋一般嚟講都喺外海，但原來都會經過香港水域，我甚至乎喺維多利亞港見過。好多人都唔相信香港有呢啲深海魚種，我自己都覺得好驚訝。」除了見過深海魚，他更同前年於深水灣出現的亞熱帶斑海豚一齊玩了三個月。「我哋嘅珊瑚同魚類海洋生物品種，以我嘅角度嚟講係多過好多地方如台灣、日本同菲律賓！」

自由潛水靠一口氣無裝備

冬天先嚟講潛水？皆因Chris話這季節比較少機會打風下大雨，海水會比較清澈。而且香港的水底冬暖夏涼，雖然拍攝當日只有17度，但Chris就說20至30米深水反而有24，25度左右。Chris黝黑的臉上長期有個潛水面罩遮住陽光造成的白印，他說：「這個印好代表到我是一位潛水愛好者，見到其他人都有這個印的時候都特別興奮，呀，搵到同類人！」他是香港第一個自由潛水教練，亦是4分鐘100米自由潛水紀錄保持者。一聽到自由潛水，好多人會有錯覺﹕「咪即係浮潛！」但兩者其實不一樣，自由潛水是指靠一口氣潛落水底，畫面優雅從容卻是一種極限運動，動作不可太激烈以減少氧氣消秏，所以用的蛙鞋比水肺潛水的長，回彈需時較久，慢慢的踢水仍能得到推動力，亦因為在水中移動得較慢，沒有水肺潛水的氣泡聲，可以更安靜地融入海底世界，與海底生物更接近。

深潛打魚太細條唔打

Chris在一年之中有一半時間出海，除了潛水教班，出海打魚是他的生活方式。「以前都有釣魚，但每次都是釣到上來先知咩魚，識得潛水後就決定落水搵，食邊條打邊條！」不過有時見到條大魚剛好無氣要上水，有一定難度。他在石澳打過最大的魚17kg重。「打唔係最難，攞住一米多長的魚槍一拉弓一射就打到，最難是打完後牠會拖著你游好幾百米，好似滑水咁，要等牠無力先可以拖上來，曾經試過有魚拖爛把魚槍！」

Chris的潛水朋友飛Sir續說﹕「你估唔到個海會有咁多沙巴龍躉，條條都幾十斤，都係啲信徒將整櫃價值十幾萬的魚放生落海。」Chris說好多人都會專程揀沙巴龍躉來打，因為數量太多又無天敵，其實會破壞海洋生態。這班現代漁人甚至會學習如何劏魚、磨刀、烹調等手藝。拍攝當日頂著七級風，浪很大，沒有收穫，以為是天氣問題，但Chris卻說只是見到些手掌般大的魚，太細條不想打。「如果是商業捕魚的話，真是賣到或吃到的可能只有魚獲嘅三成，拖網嘅話，好多珊瑚或其他海洋生物都難逃一劫。」

海底秘景可遇不可求

他的好友，亦是今日的船長Max，他曾經於馬爾代夫做了3年多潛水教練，他說香港的海底，能見度當然及不上馬爾代夫之類的潛水聖地，水質最好時的能見度只有10米，平日則只有3至5米。可是，一年有幾個星期，配合天時地利人和，還是以見到震憾的海底景觀。他最喜歡果洲一個叫一尺石的暗排，能看到太平洋的魚群經過。「會有一啲比較大型如鸚鵡魚同大石斑，仲有好多魚群。能眼見幾千條細魚喺度游，出面則有大魚喺度捕食，係香港比較少見嘅場景。」

海洋對Chris來說就像是第二個家，尤其生活在香港這樣繁忙的都市，沒有紛紛擾擾的海底，讓他完全放鬆及休息。「香港好近市區的地方已經可以找到地方潛水，而這兒的潛水環境是不錯的。而當我離開城市置身海洋，才真正感覺到自己的存在。」