「我哋玩拗手瓜好斯文的，所有嘢都有規有矩，勝負都好明顯的。」嘭一聲，強勁臂彎扳倒對手。兩個大男人谷到面都紅晒，喘住氣表現「有規有矩好斯文」。 「我明白的，好多人將拗手瓜呢樣嘢，可能視為遊戲，或者一啲叫做小學生，中學生玩吓嘅嘢。好少人會將佢當做運動專項去練。」阿宗6年前和朋友創辦了香港腕力總會，過去數年，一張比腕力的枱，逢周日在天水圍、 元朗到黃大仙都有他們的據點，歡迎有興趣的朋友來體試或切搓。疫情下活動取消了一段時間，早陣子疫情緩和，一班人乾脆合資6位數字，開了香港第一間腕力健身中心，有專用的腕力訓練器材，希望將來可以教班，讓同好拗個夠。
廿歲時，阿宗看YouTube時偶然看到，一個200多公斤的男子，拗手瓜拗過體重400多公斤的大隻佬。本以為是「造馬」，後來才發現在專業腕力賽的世界，有好多技巧可學，引發誇張的「奇績」。那時候跟另外兩個老同學研究拗手瓜，同時成立協會，到大陸或台灣學習，一拗就是6年。
今天來受訪的幾位同伙都愛拗手瓜。地盤師傅阿勤：「男人都喜歡鬥力，喜歡勝利的一刻。」有些人過去練過拳擊，但在香港，有時工作遲了下班，就沒時間去拳館練習了，拗手瓜可以一個人練習，遇上朋友隨時可練，做健身教練的Marco及堅「有時搭搭吓地鐵，兩個人可以比一比腕力。執住地鐵的柱都可以發力練一下，好方便。」
拗手瓜起步，大概有四個小技巧
第一： 手臂角度越細越好，盡量把自己縮起來，集中力量。
第二： 保持手腕伸直或前傾。同時想法子令對方手腕屈曲，難以發力。
第三： 紮穩馬步，全身使力。 第四： 手指盡量扣入對方手腕位，越深越好，牽制對方使力。
感謝Sam為我們面對世界的洪溝，來體驗一下腕力的世界。45cm粗的手臂，對上Sam 28cm粗的手臂，阿宗伸出兩隻手指：「先同佢哋鬥住先？」咁—寸？但都好喎。 Sam出盡力氣面容扭曲，阿宗眉毛都不挑一下鼓勵： 「唔駛客氣喎，你想像整斷佢都得。」不是拍攝效果？Sam真係一分鐘內出盡力扯晒哈，宗的兩隻手指依然不動如山。宗說過，體格差異未必是拗手瓜的決勝關鍵，但手掌越大，手指越粗長越有利。兩掌相遇，阿宗的手掌比Sam多上一個指節。嗯。。。。。。
阿宗做過地盤、健身教練、保險，現在做渠務工作。健身練就強勁臂彎，在工作上幫了很多。但日常生活，又有何用？去年到今年他都未想到「可以托多啲米？但我每次都係買一包，因為食唔晒。」除了跟女友買東西，拎嘢好輕鬆外，在醫院做助理人員的阿銘執起椰皇，「椰皇頂層有些位置較軟，手指可以開倒。」就用指力撕了個洞，插飲管嘆椰子水。阿勤和阿堅都會在下班時在地盤，用鐵條練一練肌肉。拍攝當日兩位攝影師拖住大喼，外加兩套腳架及器材，每次落車狼狽整理之際，阿宗好自然地已抽起四袋嘢行。樓。梯回健身室。我們只能「喂呀！」的尾隨。 唔係無用喎。
他們辦過很多賽事，又接受過一些訪問，由街頭練習去到開健身室，都是為了讓更多人認識這個運動。至今，來練習拗手瓜的人大概百多人，常出現的就大概20至30個。當中有些唔知幾時出現的女生，「一隻手數得晒。」這項運動太小眾了，在香港很難放下生計成為全職。「『就算你玩到出神入化，在香港，都是沒法出頭的，不如換練別的運動吧』，這句最常聽到的。」銘說。堅回答，「到你去比賽勝出，大家就會知道你在做甚麼了。」大家不經意齊點頭。6年來看着會員來來去去，宗都好正面，「其實我都希望，在這運動上多發掘不同的奇才。這個運動才能得到發展。這幾年遇到好多人，我們練上一段時間，很多原因，移民又好，讀書又好， 有自己的家庭就減少聚會。能力許可下，我都希望可以堅持下去。」